2026 წლის 16 ივნისს საქართველოს ტექნიკური უნივერსიტეტი უმასპინძლებს მნიშვნელოვან ღონისძიებას — „დანტეს დღის“ აღნიშვნასა და „დანტე ალიგიერის საზოგადოების — თბილისის კომიტეტის“ დაარსებიდან 20 წლის იუბილეს.
ღონისძიება გაიმართება დანტე ალიგიერის საზოგადოების თბილისის კომიტეტისა და საქართველოს ტექნიკური უნივერსიტეტის თანამშრომლობითა და საქართველოში იტალიის საელჩოს მხარდაჭერით და მიეძღვნება იტალიური ენისა და კულტურის პოპულარიზაციის მიმართულებით საზოგადოების მიერ გაწეული ოცწლიანი საქმიანობის შეჯამებას და საქართველოსა და იტალიას შორის კულტურული ურთიერთობების კიდევ უფრო გაღრმავებას.
საზეიმო ღონისძიებას დაესწრებიან საქართველოსა და იტალიის აკადემიური, კულტურული და დიპლომატიური წრეების გამორჩეული წარმომადგენლები.
ღონისძიების ერთ-ერთი საპატიო სტუმარია „დანტე ალიგიერის საზოგადოების“ გენერალური მდივანი, სტუ-ს საპატიო დოქტორი, პროფესორი ალესანდრო მაზი, რომლის ოფიციალური ვიზიტი თბილისში განსაკუთრებულ მნიშვნელობას სძენს ღონისძიებას და ნათლად ასახავს იმ მაღალ შეფასებასა და მხარდაჭერას, რომელსაც „დანტე ალიგიერის საზოგადოების“ სათავო ოფისი თბილისის კომიტეტისა და მისი საქმიანობის მიმართ იჩენს.
ღონისძიებას ოფიციალურად გახსნის საქართველოს ტექნიკური უნივერსიტეტის რექტორი, აკადემიკოსი დავით გურგენიძე, რომელიც მრავალი წელია აქტიურად უწყობს ხელს იტალიასა და საქართველოს შორის აკადემიური და კულტურული ურთიერთობების განვითარებას.
დამსწრე საზოგადოებას მისასალმებელი სიტყვით მიმართავს საქართველოში იტალიის საგანგებო და სრულუფლებიანი ელჩი, მისი აღმატებულება მასიმილიანო დ’ანტუონო. მისი მონაწილეობა ადასტურებს კულტურული დიპლომატიის განსაკუთრებულ მნიშვნელობას საქართველოსა და იტალიას შორის არსებული მჭიდრო თანამშრომლობის განვითარებაში.
ღონისძიებაზე სიტყვით გამოვლენ „დანტე ალიგიერის საზოგადოების“ კავკასიის რეგიონის კოორდინატორი პროფ. ალესანდრო სალაკონე, ასევე თბილისის კომიტეტის პრეზიდენტი პროფ. ნინო ცერცვაძე, რომელიც მიმოიხილავს კომიტეტის ოცწლიანი საქმიანობის უმნიშვნელოვანეს ეტაპებს და ყურადღებას გაამახვილებს კომიტეტის როლზე საქართველოში იტალიური ენის, განათლებისა და კულტურის გავრცელების მიმართულებით.
ღონისძიებას განსაკუთრებულ საზეიმო ელფერს შესძენს პოეტ დათო მაღრაძისა და ცნობილი მეცო-სოპრანო ნინო სურგულაძის მონაწილეობა.
ღონისძიების პროგრამა:
• მისასალმებელი სიტყვები;
• აკადემიური, დიპლომატიური და კულტურის სფეროების წარმომადგენლების ოფიციალური გამოსვლები;
• „დანტე ალიგიერის საზოგადოების — თბილისის კომიტეტის“ დაარსებიდან 20 წლის იუბილესადმი მიძღვნილი საზეიმო ნაწილი;
• სერტიფიკატების გადაცემა;
• კულტურული და შემოქმედებითი პროგრამა.
„დანტე ალიგიერის საზოგადოება“, რომელიც 1889 წელს დაარსდა ქალაქ რომში, მსოფლიოში იტალიური ენისა და კულტურის პოპულარიზაციას ემსახურება. ორგანიზაცია საქმიანობას ახორციელებს საერთაშორისო ქსელის მეშვეობით, რომელიც ხუთ კონტინენტზე მოქმედ კომიტეტებს აერთიანებს.
დღეს „დანტე ალიგიერის საზოგადოების“ თბილისის კომიტეტი კავკასიის რეგიონში ერთ-ერთი ყველაზე აქტიური და წარმატებული ორგანიზაციაა. იგი მნიშვნელოვან როლს ასრულებს საქართველოსა და იტალიას შორის კულტურული დიალოგის, საგანმანათლებლო თანამშრომლობისა და მეგობრული ურთიერთობების განვითარებაში.
ღონისძიებაზე დასწრება თავისუფალია სტუდენტებისთვის, აკადემიური და კულტურის სფეროების წარმომადგენლებისთვის, ასევე „დანტე ალიგიერის საზოგადოების“ მეგობრებისა და ყველა იმ დაინტერესებული პირისთვის, ვისაც სურვილი აქვს მონაწილეობა მიიღოს საქართველოსა და იტალიას შორის თანამშრომლობისა და მეგობრობისადმი მიძღვნილ ამ საიუბილეო აღნიშვნაში.
16 ივნისი, 2026 წელი, 17:00 საათი
საქართველოს ტექნიკური უნივერსიტეტი (სტუ)
ადმინისტრაციული კორპუსი, ბიბლიოთეკის საკონფერენციო დარბაზი
თბილისი, მერაბ კოსტავას ქ. №77,
ფოტო და ვიდეომასალა ხელმისაწვდომი იქნება ღონისძიების ოფიციალურ Facebook-გვერდზე:
https://www.facebook.com/dantealighierissazogadoeba
———————————————————–